BUTUAN CITY – Nagpahimangno ang Department of Labor and Employment (DOLE) ngadto sa mga employers nga kinahanglang ihatag sa hustong oras ang final pay ug Certificate of Employment (COE) sa mga trabahante tungod kay kung dili, mahimo silang mag- atubang og reklamo ug silot.
Sumala ni Labor Secretary Bienvenido Laguesma, kini subay sa direktiba ni Pangulong Ferdinand Marcos Jr. nga palig-onon ang proteksyon sa katungod sa mga trabahante. Base sa datos sa DOLE, ang isyu sa final pay mao ang nag-una nga reklamo niadtong 2025, nga mi-abot sa 23,496 ka kaso gikan sa 168,853 nga nadawat sa ilang Hotline 1349.
Ilalom sa Labor Advisory No. 06, Series of 2020, ang final pay angay ihatag sulod sa 30 ka adlaw gikan sa pagbiya sa empleyado, samtang ang COE kinahanglan ipagawas sulod sa tulo ka adlaw gikan sa petsa sa hangyo.
Sakop sa final pay ang tanang suhol ug benepisyo sama sa wala pa nabayarang suhol, pro-rated nga 13th month pay, separation o retirement pay, ug bayad sa wala magamit nga leave.
Gidasig usab sa DOLE ang mga manggagawang wala pa makadawat sa ilang final pay o COE nga motawag sa Hotline 1349, mag-email sa hotline1349@dole.gov.ph, o makigkontak sa opisyal nga Facebook page sa ahensya.
