BUTUAN CITY – Gipaniguro ni kanhi House Speaker ug Leyte Representative Ferdinand Martin Romualdez ang iyang pag-abag sa Independent Commission for Infrastructure (ICI) kalabot sa mga alegasyon sa proseso sa nasudng badyet aron ang kamatu-uran matud oa ang mupatigbabaw ug dili ang pulitika.
Sa iyang pag-atubang sa mga tigbalita, gipadayag niini nga ang iyang pagtambong sa pagdungog sa ICI, pamatuod lang sa iyang suporta sa pagpangita sa kamatu-uran tungod kay wala matud pa siya’y gitago. Gitin-aw niini nga bisan og dili siya apil sa bicameral conference committee nga maoy mutapos sa badyet, andam siyang ipa-ambit ang iyang nasayran aron makatabang matud pa paghatag og katin-wan kalabot sa maong mga isyu.
Ang iyang pagtambong, kabahin matud pa sa iyang gibarugan nga transparensiya ug accountability, aron makatabang sa paspas ug patas nga imbestigasyon.
Nagpasalamat usab si Romualdez sa ICI sa paghatag kaniya og higayon nga mapa-ambit ang proseso, ug gipaniguro ang iyang ka-andam nga tubagon ang tanang mga pangutana aron mapaspasan ang pagresolba sa mga isyu.
Samtang gipadayag usab ni Independent Commission for Infrastructure (ICI) Spokesperson Brian Keith Hosaka nga mabulukon ang pag-atubang nila Romualdez ug Budget Sec Amenah Pangandaman, tungod sa mga importanteng impormasyon kalabot sa mga kontrobersyal nga flood control projects nga gipunduhan ilalom sa 2024 ug 2025 national budgets.
Giklaro usab niini nga wala’y contempt powers ang komisyon apan mala-umon kining makakuha og kooperasyon gikan sa mga opisyal ng gobyerno aron makuha ang tumong niining limpyuhan ang sistema sa infrastructure spending sa nasud.
Magpagawas usab ang ICI og preliminary report sa musunod nga mga semana base sa testimonya nila Romualdez, Pangandaman, ug uban pang mga resource persons.
