BUTUAN CITY – Gitumbok ni kanhi Ako Bicol partylist Rep Zaldy Co sa iyang gipagawas nga katapusang video statement nga First Lady Liza Araneta-Marcos ang duna’y kontrol sa mga rice importers sa nasud hinungdan nga wala’y napadulngan ang imbestigasyon sa kamara dihang gi-imbestigahan ang grabeng pagsaka sa presyo niini niadtong tuig 2023.
Sigon sa kanhi kongresista, niadtong Abril 2023 nagsugod matud pa pagsaka ang presyo sa bugas rason nga iyang gisugyot kang kanhi House Speaker Martin Romualdez nga mag-angkat sila og 13-milyunes ka metriko toneladang bugas alang sa entiro tuig aron makunhuran ang presyo sa bugas og 22-pisos matag-kilo.
Nasubo siya tungod kay wala matud pa kini aprubahi ni Pangulong Ferdinand ‘Bongbong’ Marcos Jr rason nga mi-abot sa 55-pisos kada-kilo ang presyo sa bugas hangtud ning mi-aging tuig 2024.
Sa susamang tuig, iya na usab nga gihangyo si Romualdez nga istoryahon sila Agriculture Sec Francisco Tiu-Laurel Jr ug kanhi Finance Sec Ralph Recto aron kunhuran ang taripa sa bugas gikan sa 35 ngadto na sa 15-porsiento.
Kung wala matud pa niya gipasabot nga masuko ang katawhan kung padayon ang pagsaka sa presyo sa bugas nga maka-apekto sa May 2025 elections, dili unta aprubahan ang iyang sugyot atol sa meeting.
Dihang wala gihapon mikunhod ang presyo sa bugas taliwa sa pagpakunhod na sa taripa, dinhi na matud pa niya gisugyot nga imbestigahan kini kansa gikuptan usab sa Quinta Committee sa Kamara pagpanguna ni Rep Joey Salceda.
Dihang kamulo ang imbestigasyon, gipahunong na lang kini ni Agriculture Sec Laurel-Tiu human nasuta sa nadawat niining confidential report nga ang first lady matud pa ang nagkontrol sa mga rice importers.
Dinhi na usab mitawag si presidential son ug Rep Sandro Marcos ngadto kang Romualdez nga ka-uban niya adtong higayuna kondiin gimanduan ang kanhi house speaker nga ihunong matud pa ang imbestigasyon, base sa mando sa iyang amahan.
