BUTUAN CITY – Dili mu-ubos sa 20 ka mga Palestino ang patay sa Israeli air strike nga mi-igo sa usa ka sikat nga seafront cafe sa Gaza kansa kanunay nga gidayo sa mga aktibista, mga tigbalita ug mga residente.
Sigon sa Civil Defence nga gipadagan sa Hamas, gihakot sa mga rescue teams ang 20 ka patay’ng lawas ug ubay-ubay nga angol gikan sa Al-Baqa Cafeteria, usa ka outdoor venue nga duna’y mga tents sa baybayon.
Makalilisang ang senaryo tungod sa nagkatag nga patay’ng lawas, dugo ug lanog nga singgit sa mga tawo. Ang Al-Baqa Cafeteria nahimong inilang lugar alang sa mga journalists, mga aktibista ug mga remote workers, tungod sa gihanyag niining internet access, mga lingkuranan ug workspace sa Mediterranean coast sa Gaza.
Nasayrang mihimo ang Israel og sunod-sunod nga air strikes sa kinatibuk-ang Gaza Strip sa tibuok gabii, hinungdan sa paghikling na usab sa gatusang mga Palestinong pamilya. Gihimo kini sa Israel human ang pinakadakong evacuation orders nga ilang gipagawas sukad gibalik ang giyera niadtong Marso ning tuiga.
