BUTUAN CITY – Gipahayag sa nasuspending kapitan sa Barangay Ampayon, Butuan City nga si Rodencio Basubas jr, nga si First Kagawad Danilo Maisog ang gitudlong Office-in-charge kon OIC sa nasangpit nga barangay sulod sa 3 ka buwan.
Sa eksklusibong pakighinabi ning sibyahan kang Basubas, giklaro niining gihatagan og order gikan sa Department of Interior and Local Government kon DILG si kagawad Maisog kaganina lang.
Kini ang nahimong pagklaro ni Basubas tungod sa kalibog sa katawhan sa Barangay Ampayon human miadtu sa Barangay Hall si kanhe kapitan Felix Dennis Gonzaga kauban ang iyang mga tig-suporta.
Naglibog si Basubas sa unsay katuyuan ni Gonzaga hinoon nakabalda lang kini sa operasyon sa barangay tungod kay mibati og kabalaka man ang mga empleyado niini. Pagbutyag pa niini nga kung dunay kagustuhan si Gonzaga nga molingkod sa barangay, dapat musubay kini sa saktong proseso pinaagi sa pag-adtu sa DILG.
Apan gipasabot ni Basubas nga base sa iyang nasabtan sa balaod, ugaling masuspinde lang ang kapitan, ang DILG ang dunay kagahom sa paghatag og order isip OIC sa First Kagawad apan kung mawala na sa hingpit ang kapitan sama nalamang kung kini mapatay na, dinhe na dunay katungod ang mayor sa pag-appoint kung kinsa ang papulihon niini sa nabiyaang puwesto.
Una nang nagtapok-tapok sa gawas sa Barangay hall ang mga supporters nila Gonzaga diin nagpaabot sa kung kinsa gayuy molingkod isip OIC kapitan.
Tungod niini, gipanawagan ni Basubas ang taga DILG nga maoy mangusog aron mahimong malinawon og matin-awan ang tanang katawhan sa Barangay Ampayon.
Abli usab ang sibyahan alang sa kabahinan ni Gonzaga apan kaganina, nagdumili kini sa paghatag og pamahayag.
