BUTUAN CITY – Giatras na ni Kenya President William Ruto ang finance bill nga dunay unod sa kontrobersyal nga pagtaas sa buwis.
Ang nasangpit nga desisyon ang misunod sa nahitabong halapad nga lihok protesta nga gikamatay sa 22 katawo. Sa iyang pamahayag, gilatag niini ang mga nag-unang katuyuan sa Finance bill 2024 nga iyang gisugyot.
Apan sa pagpadagan matud pa niya sa gobyerno, kinahanglan niyang maminaw sa mga tawo nga karun tataw nga misupak sa maong balaodnon.
Tungod niini, gibarugan sa presidente nga dili na niya pirmahan ang nasangpit nga sugyot balaodnon. Pamugos pa niini nga angayan nga sundon kung unsa ang gusto sa mga tawo.
Mahinumdumang miulbo ang lihok protesta human napalabang sa mga magbabalaod ang sugyot balaodnon nga nagtumong nga magdugang og buwis sa mga palitonon.
Gi-atake sa mga protesters ang parliament building diin nagtago ang pipila ka mga magbabalaod sa maong nasud rasong napugos nga mogamit ang mga kapulisan sa tear gas.
