BUTUAN CITY – Ninghangyo ang filmmaker nga si Darryl Yap sa korte og gag order gikan sa Muntinlupa City Regional Trial Court (RTC) Branch 205 arun mapugngan ang kampo sa beteranong aktor ug host nga si Vic Sotto nga mahisgutan ang bisan unsang detalye mahitungod sa kasong may kalambigitan sa kontrobersyal nga pelikula niining ‘The Rapists of Pepsi Paloma’.
Tubag ang maong mosyon sa reklamo ni Sotto nga naglangkob sa 19 counts sa cyber libel, ug sa P35 milyon gipangayong bugti sa damyos.
Nagsugod ang bangi sa duha ka kampo human gipagawas ni Yap ang teaser sa bag-o niining pelikula niadtung Enero 1, 2025, kansa naglangkob matud pa sa mga pamahayag nga nag daot sa pagkatawo ni Sotto, kansa gikutay sa ning panaw nga sexiest star niadtung dekada ’80 nga si Pepsi Paloma.
Pamugos sa legal counsel ni Yap nga si Atty. Raymond Fortun nga ang pagbutyag sa verified return, mamahimong pagyatak matud pa sa freedom of expression ni Yap ug mamahimong makadaot pa sa pelikula, ilabi na nga wala pa kini napagawas sa mga sinehan.
Ugaling tugotan ang gag order nga gihangyo ni Yap, mamahimo kining makapahunong kang Sotto o sa mga tigpamaba niini nga hisgutan ang maong kaso sa publiko.
Sigon sa kampo ni Yap nga nagsumikad kini sa ‘sub-judice rule,’ nga nagbawal sa publiko nga magkomento sa mga kasong dunay kasamtangang pagtaral.
