BUTUAN CITY – Gi-activate na sa Philippine Embassy sa Tel-Aviv, Israel ang crisis management team niini isip lakang alang sa daling pagresponde ngadto sa mga Pilipino nga naipit sa nagpadayong gyera sa tali sa Israel ingon man Iran.
Sayrang gipalig-on sa embahada ang pag-monitor sa mga Overseas Filipino Workers kon OFW’s nga anaa sa maong nasod, arun dali rang masayran ang ilahang sitwasyon.
Kini taliwala sa padayong pagbinayloay og bomba sa Israel ug Iran nga nag sugod ning nakalabayng adlaw. Subay niini, personal nga gitutukan ni Philippine Ambassador to Israel Aileen Mendiola ang mga pagpaningkamot arun ma-monitor ang sitwasyon sa mga mga Pilipino on the ground.
Subay sa maong pagpaningkamot, nakig-alayon na ang embahada ngadto sa mga otoridad sa Pilipinas ingon man sa Israel arun masiguro ang tukmang mga abiso ngadto sa mga Pinoy. Sumala sa envoy nga padayon pa gihapon ang pag-intercept sa Israel sa mga retaliatory missile strikes sa Iran.
Giawhag usab sa maong ahensya nga sundon sa mga Pilipino ang mga security guidelines sa Israel Defense Force Home Front Command lakip na ang safety advisories gikan sa Embahada.
Subay niini gipalig-on usab sa Department of Foreign Affairs kon DFA ang kaluwasan sa mga Pilipino nga anaa sa duha ka mga nasod pinaagi sa gipakusgang Middle East Help Desk.
Una nang gikataho sa DFA nga walay Pilipinong angul sa mga air strikes ngadto sa Israel gikan sa Iran. Sa kasamtangan, duna pay 30,743 ka mga Pilipino sa Israel, samtang 1,180 usab ang anaa sa Iran.
