BUTUAN CITY- Mingboto ang tingog sa Federation President sa Eastern Suburb Four-Seater Toda, nga si Ritchie Ravelo, kalabot sa kritikal nga pagsaka sa presyo sa gasolina karong adlawa.
Sigon pa niini, kinahanglan nga masabtan sa mga pasahero ang kahimtang sa mga drayber nga wala pa gyuy nakuhang ayuda gikan sa gobyerno. Tungod sa padayon nga kakulang sa aksyon, mapugos ang sektor sa tricycle nga mopataas sa pamasahe aron mapadayon ang serbisyo sa komunidad.
Matud pa ni Ravelo, nga ang epekto niini dili lang mabati sa mga drayber nga nag-antos sa gasto, apan lakip usab ang mga commuters nga masang-at sa dugang nga bayad-pamasahe. Gani nangayo pa kini og pagsabot ug kooperasyon gikan sa publiko samtang nagpadayon ang kalisod sa sektor sa transportasyon.
Dugang pa ni Ravelo, nga kinahanglan na gyud sundon ang ordinansa sa pamasahe aron malikayan ang kalibog ug dugang nga problema sa sektor sa transportasyon.
Matod pa niya, gamay ra ang tubo sa plitehan base sa ordinansa ug kini mao unta ang angay ipatuman ilabi na nga gasolina ang basihanan sa operasyon sa mga tricycle.
Gibutyag usab ni Ravelo, nga kinahanglang gipangandaman na unta kini, apan hangtod karon kulang pa gihapon ang aksyon ug ayuda gikan sa gobyerno.
Bisan pa nga ang LTFRB nagpagawas na og ayuda, gani sa dakbayan sa Butuan sigon pa niini, nga ang DSWD nagapod-apod og ayuda pinaagi sa AICS program, apan pinili ra naka-base gihapon sa gi-ingong listahan.
Nagpasidaan usab si Ravelo, nga kung dili dayon ipatuman ang fuel subsidy, mosaka ang inflation ug masang-at kini sa katawhan. Busa iyang gi-awhag ang gobyerno nga hatagan og prayoridad ang mga drayber ug commuters aron mapadayon ang serbisyo sa transportasyon nga walay dugang kalisod.
