Karong adlawa, atong gihandom ang adlaw sa mga bayani kon National Heroes’ Day, usa ka regular holiday sa nasud aron atong handumon ang ‘Cry of Pugadlawin’ nga gihimo sa rebolusyunaryong pwersa sa mga Pilipino nga mas nailang Katipunan kansa gipangunahan sa ilang lider kon supremo nga si Andres Bonifacio.
Matag-ika-upat nga Lunes sa buwan sa Agusto, ang paghandom niini ginahimo subay na usab sa nakalatid sa Akta Republika Numbero 3827 nga gipapasar sa lehislatura sa Pilipinas niadtong Oktubre 28, 1931.
Kini nga national holiday naghatag og pasidungog sa tanang mga bayani sa nasud lakip na kadtong mga pangalan nga hingpit nang nawala sa kasaysayan sa PIlipinas ilabina kadtong mga unsung Filipino heroes.
Kini nga okasyon gituyo aron mahatagan og atensyon ang tanang mga Filipinos nga mi-alsa alang sa kalinaw, kagawasan og demokrasya kinsang ma trabaho ug binuhatan, nakatabang sa pagkab-ot sa kagawasan ug demokrasya sa pag-umol sa atong nasud.
Dili ikalimod nga daghan kanato ang wala masayod sa tinud-anay nga esensya niini nga mga selebrasyon ilabina nga daghan na sa atong mga kabatan-unan ang duna lama’y gamay nga kasayuran sa kasaysayan sa atong nasud.
Alang kanato, ang pinakamahinungdanong butang, dili mao ang nahimo sa atong mga bayani sa nanglabay’ng panahon kondili ang epekto sa ilang gihimo ngadto sa atong nasud ug sa ato karong natagamtaman.
Tungod sa pag-alsa sa atong mga bayani kondiin ilang gisugal ang ilang kinabuhi, ato karong natagamtaman ang kagawasan.
Sama kang Dr. Jose Rizal, kinsa nagsulti sa mga pulong nga ang dili milingi sa iyang gigikanan, dili maka-abot sa iyang padulngan kansa nagpabiling buhi karon nga henerasyon.
Bisan unsa pa man ka makadismaya ang atong sitwasyon karon ilabina ang kagubot sulod sa atong nasud kondiin nagbangi ang mga Pilipino batuk sa isig ka Pilipino inay nga batuk sa langyaw’ng nasud nga misulay pagbungkag sa atong kalig-on ugpanaghi-usa, angayan natong masayran nga ang atong nasud, wala hikawi sa mga kalihukang bayanihon bisan karon nga panahon diin anaa ang pagpanglutos.
Usa ka maayong ehemplo niini ang atong mga kasundaluhan ug mga sakop sa Philippine Coast Guard nga nakigbatok sa mga pwersa sa China nga padayong mi-ilog sa atong sobereniya ug claim sa West Philippine Sea kondiin kanunay nga gilbarugan sa atong nasud ang malinawong pagresolba sa claim taliwa sa pila ka higayon nang pagpang-harass sa mga barko sa China sa atongmga barko.
Kanunay nga gipahinumdom sa atong gobyerno nga atong tamdan ang kalinaw apan nalimtan usab nga kini ma-angkon lang, pinaagi sa pagsugod niini sa atong kaugalingon ug dili sakyan sa kalaog sa gahom.
Karong panahuna, nagkinahanglan kita og bayani nga maglingkawas kanato gikan sa mga hagit nga ato karong gi-atubang ug maghatag og kahayag sa tibuok kalibutan ilabina kadtong maghatag og kahayag sa ngitngit nga tadlas sa kinabuhi aron magsilbing giya sa katawhan nga nawad-an na og paglaum nga makalingkawas gikan niini.
Sa mga nagakahitabo karon sa atong nasud, nagkinahanglan kita og mga tawong andam mu-asdang ug mupadayag ug mupakita sa iyang kasibot nga hi-usahon ang tanan sa usa lamang ka tumong, ang pagklingkawas sa mga Pilipino gikan sa bakus sa kalisod .
Sigon ni historianEufemio Agbayani III, kinahanglan natong mahimong bayani saatong tagsa-tagsa ka kaugalingon sa ingon ang mga sakripisyong gihimo sa atong mga bayani sa nanglabay’ng katu-igan, dili lamang mahulog sa wala.
