BUTUAN CITY – Gidawat na ni Pangulong Ferdinand Bongbong Marcos Jr. kagahapong adlawa, Agusto 31 ang resignation ni Department of Public Works and Highways (DPWH) Secretary Manuel Bonoan.
Sumala ni Presidential Communications Office kon PCO Sec. Dave Gomez, gihulip kaniya si Department of Transportation kon DOTr Sec. Vince Dizon.
Mahinumdumang niadtong Sabado, nagpagawas na og video message si Bonoan nga nagpadayag nga hugot niyang gibarugan nga dili siya mukanaog sa iyang posisyon o kaha mag-leave taliwa sa nagkakusog nga panawagan tungod sa lapad nga kurapsyong nalambigitan sa iyang ahensya.
Sa iyang gipagawas nga video message, iyang gi-angkon ang kasakit nga gibati sa katawhan sa lapad nga kurapsyong natigayon diha sa gipatuman nilang mga flood control projects nga nahitabo ubos sa iyang liderato.
Apan taliwa niini, dili matud pa solusyon sa problema ang iyang pag-resign o kaha pagpalayo, dayong saad nga gukdon niya ang mga nakasalang contractors ug mga opisyal.
Iya pang gipadayag nga komitido siyang patubagon ang mga nakasala ug ipatuman ang anti-corruption campaign sa ingon, dili na kini masubli pa.
Gisuspende na niini ang personal travel sa abroad alang sa tanang mga DPWH officials hangtud sa katapusan sa Nobyembre ning tuiga alang sa gikinahanglang transparensiya ug project validation.
Si DPWH Secretary Manuel Bonoan. Kagahapon, nakurat na lang ang tanan sa kalit nga pagbali sa hitabo human gibaniog sa Malakanyang nga gidawat na sa pangulo ang iyang resignation letter.
