BUTUAN CITY – Gibutang sa Food and Drug Administration (FDA) sa regulatory scrutiny ang duha ka dagkong retail chains human sa inspeksyon kondiin napalgan ang daghang pagkaon ug health products nga gibaligya nga walay hustong rehistro, labeling ug dokumentasyon.
Sigon sa FDA, sa inspeksyon nakit-an nga ang pipila ka produktong wala’y gikinahanglan nga otorisasyon ug traceability requirements.
Ang inspeksyon nga gipangulohan ni FDA Director General Paolo Teston kabahin sa usa ka nasudnong inisyatibo aron masiguro ang pagtuman sa rehistro, labeling, kaluwasan ug traceability standards.
Human sa inspeksyon, nagpagawas ang ahensya og pormal nga sulat ngadto sa duha ka retailers aron pahinumdoman sila sa ilang legal nga obligasyon nga masiguro nga ang tanang pagkaon ug health products nga gibaligya rehistrado, sakto ang label ug hingpit nga matun-an ang gigikanan.
Nagpahimangno usab ang FDA nga ang dili pagtuman mahimong mosangpot sa regulatory ug legal nga aksyon, lakip na ang pagkumpiska sa mga produkto, suspensyon o pagkansela sa lisensya, pagsira sa operasyon ug pag-file og administrative o criminal cases.
Ang enforcement dili lang matud pa kutob sa physical stores, tungod kay ang dagkong retailers adunay kritikal nga papel sa supply chain, lakip na ang distribusyon ngadto sa online platforms ug digital marketplaces.
