BUTUAN CITY – Stranded sa Israel ang 17 ka mga Filipino local government officials nga gialngkuban sa mga Mayor ingon man mga regional directors sa nagkalain-laing ahensya, human kini naipit sa gyera tali sa Iran ug Israel nga nagsugod pagdako niadtung Hunyo 13.
Kahibaloang anaa sa Israel ang nasangpit nga mga opisyal alang sa study visit ug training program kansa gipangulohan sa Israeli Government Officials. Apan gisirad-an sa Israel ang ilahang airspace ug mga utlanan tungod sa pagpamombang nadawat gikan sa Iran.
Sumala ni Israel Ambassador to the Philippines Ilan Fluss, anaa una karon sa MASHAV center ang mga delegadong opisyal sa Pilipinas, apan giklaro niining gipaniguro sa Israel ang ilahang kaluwasan lakip na ang mga panginahanglanon.
“All of them are being taken care of by the Israeli government and we are also looking for ways to send them back to the Philippines —this is our responsibility and our commitment,”
Israel Ambassador to the Philippines Ilan Fluss
Dugang sa Ambassador nga gidoble na sa Israeli government ang ilahang paningkamot arun makauli sa labing daling panahon ang mga opisyal dinhia sa nasod.
Lakip sa mga na-stranded ang tulo ka mga Mayor sa Eastern Visayas region nga sila si Mayor Aron Balais sa Barugo, Leyte; Mayor Athene Mendros sa Lawaan, Eastern Samar; ingon man si Mayor Betty Cabal sa Hindang, Leyte.
Sigon usab ni Irit Savion, ang deputy head sa MASHAV, Israel’s Agency for International Development Cooperation nga lakip sa ilahang unang plano mao nga sa Jordan mo-agi ang nasangpit nga mga Pinoy, apan dugang niini nga wala kini nahinayon tungod kay gubot pa usab sa maong dapit.
Subay usab sa mesaheng gipadala ni Mayor Balais sa mantlaaan sa Leyte nga anaa pa sila sa bombo shelter nagpahipi.
Sayrang karon pa untang umalabot nga petsa 20 sa Hunyo ang balik sa nasangpit nga mga opisyal nganhi sa Pilipinas. Niabot sila sa Israel niadtu pang Hunyo 7 ngadto sa 9.
Kanselado usab ang event nga ilahan untanang apilan.
