BUTUAN CITY – Mikunhod og 76-porsiento ang natalang firecracker-related injuries dinhi sa Caraga Region karon nga holiday season partikular gikan sa Disyembre 21, 2025 hangtud kagahapong adlawa, Enero 2 ning tuig 2026.
Gikumpirma kini ni Dr Amethyst Kathleen Alicante, ang hepe sa Regional Epidemiology and Surveillance Unit/Health Emergency Management Services kon RESU/HEMS cluster sa Department of Health-Center for Health and Development-Caraga.
Sa eksklusibong pakighinabi sa Bombo Radyo Butuan, gipadayag ni Dr Alicante nga tulo lang ka mga kaso ang ilang natala ning rehisyon kondiin duha maong ihap, natala sa Surigao del Norte samtang usa usab sa Agusan del Norte kansa dako nga porsiento kung ikumpara sa natala ning mi-aging tuig nga mi-abot sa 13 ka mga kaso.
Gipasabot pa sa opisyal nga ang maong mga kaso naggikan mismo sa ilang mga sentinel sites nga mao ang Adela Serra Ty Memorial Medical Center ug Caraga Regional Hospital.
Ang maong mga sentinel sites matud pa duna’y Online National Electronic Injury Surveillance System kon ONEISS system – usa ka digital platform nga gigamit sa pag-monitor ug pag-rekord sa mga injury cases sa tibuok Pilipinas.
Gikumpirma usab sa opisyal nga ang naka-angol sa mga biktimang mga bata ug batan-on, mao kadtong gi-ban nga mga pabuto kondiin injury sa nawong ug mata ang na-igo.
Giklaro usab ni Dr Alicante nga ang maong datus, dili pa final tungod kay magpadayon pa man ang ilang monitoring hangtud sa Enero 6 rason nga padayon ang ilang kampanya nga dili na mugamit og mga pabuto aron luwas ang pagsa-ulog sa Pasko ug pagsugat sa bag-ong tuig.
