BUTUAN CITY – Nanawagan si Pangulo Ferdinand Marcos Jr. sa tanang ahensya sa gobyerno nga magpabiling naka-full alert ug siguruhon ang kaluwasan sa publiko samtang padayon nga nagkakusog ang bagyong Uwan nga karon nagpadool sa Amihanang Luzon.
Panawagan sa presidente nga maghi-usa ang tanan kay mahinungdanon ang matag-segundo.
Gipahinumduman usab sa Punong Ehekutibo ang tanan nga magpabiling kalmado ug dili magkampante ug kinahanglan musunod sa mga pahimangno sa lokal nga panggamhanan ug dali nga muhikling ang mga nagpuyo sa mga delikadong lugar kung kini imando ug andamon ang ang-unang kinahanglanon ug magpabiling maminaw sa opisyal nga mga pahibalo.
Sumala sa Philippine Atmospheric, Geophysical and Astronomical Services Administration (PAGASA), paspas ga mikusog ang bagyong Uwan sulod sa mi-aging 24 ka oras samtang kini anaas pa sa dagat sa Pilipinas, ug posibleng mosamot pa kini’g kusog, base sa pinakabag-ong pahimangno sa ahensya.
Gipadayag sa pangulo nga ang Department of Transportation (DOTr) ug Land Transportation Franchising and Regulatory Board (LTFRB) nag-deploy na og mga bus ug truck alang sa evacuation effort samtang ang Department of Social Welfare and Development (DSWD), Department of Public Works and Highways (DPWH), Armed Forces of the Philippines (AFP), ug Philippine Coast Guard (PCG) nakaposisyon na sa mga high-risk areas uban sa mga rescue vehicles, lifeboats, ug relief goods.
