BUTUAN CITY – Mitaas ang farmgate price sa palay niadtong Enero 2026, base sa report sa Philippine Statistics Authority kon PSA.
Migawas sa monitoring sa nasangpit nga ahensiya nga muabot na sa P20.10 ang kada kilong presyo sa palay sa nakalabay nga buwan, kapin dos pesos nga mas taas kumpara sa P18.01 nga presyuhanay niadtong buwan sa Disyembre.
Bisan paman, miubos og dyutay pa gihapon ang nasangpit nga presyo kumpara sa farmgate price niadtong Enero 2025.
Misaka usab og dyutay ang presyo sa regular milled rice niadtong unang parte sa Pebrero kumpara niadtong buwan sa Enero.
Base pa gihapon sa datus sa PSA, mitaas og 4.1% ang presyo gikan sa kanhe P43.76 kada kilo padulong sa kasamtangang P45.54 ang kada kilo.
Apan kung ikumpara sa kaparehong buwan niadtong nakalabay nga tuig, mas ubos ang average price ning tuiga tungod kay miabot kaniadto sa P47.77 ang kada kilong presyo sa regular milled rice.
