BUTUAN CITY – Tingkagol na sa karsel sa Bansalan, Davao del Sur ang usa ka faith healer human niini gitigbas-patay ang iyang silingang mag-uuma kinsa ka-uban pa niya sa paghantak didto sa Purok Nakasaka, Brgy. Poblacion Dos, pasado alas-5:0 kagahapon sa hapon.
Naila ang biktima nga si Gorgonio Alforo Burlaza, 63-anyos, ug biyudo samtang ang suspetsado, naila usab nga si Victoriano Ruteres Palermo alyas Victor Cobra, 62-anyos, minyo, parehong residente sa maong dapit.
Nasayrang naghantak pa ang duha ka-uban sa lain nilang usa ka silingan samtang nag-inom hangtud nga nagkalalis ug dinhi na mikuha og sundang si Palermo dayong tigbas kang Burlaza sa managlahing parte sa lawas rason nga wala na kini naka-abot pang buhi dihang gidala sa ospital.
Dihang wala pa natagbaw sa iyang gihimo, gidamay pa niini pagtigbas ang binuhing manok ug iro ug ang pedicab dayong sibat apan nadakpan gilayon sa gihimong manhunt operation sa kapulisan.
Gi-andam na sa kapulisan ang mga kinahanglanong dokumento alang sa ipasakang kasong murder batuk sa suspetsado.
