BUTUAN CITY – Gisuspende na sa lokal nga kagamhanan sa Veruela, Agusan del Sur niadto pang weekend ang tanang face-to-face gatherings, mga misa ug public gatherings.
Kini isip pagsunod sa Executive Order No. 10 nga gi-isyu sa probinsyal nga panggamhanan niadtong Mayo 18 alang sa susamang katuyuan.
Base sa EO nga gipirmahan ni Mayor Myrna Mondejar, apil sa gidili ang mga kalihukan sa simbahan na duna’y 50-porsientong venue capacity; sabong ug operasyon sa sabong; mga entertainment venues sama sa mga karaoke bars ug mga internet o kaha computer gaming shops.
Bawal na usab ang mga panagtapok sa pamilya higayong duna’y mag-birthday; anibersaryo, salu-salo ug mga tigom.
Bawal na usab ang mga trainings, seminars, conferences ug pay-out apil na ang pag-courtesy call; inagurasyon o kaha turn-over ceremonies; paglusad og mga programa sa uban pang susamang kalihukan nga makonsiderang super-spreader events.
