BUTUAN CITY – Naglusad na og full-blown investigation ang lokal nga kagamhanan ning siyudad sa Butuan subay sa expose ni 2017 Mutya Hong Butuan Yves Madeleine Arbis atol mismo sa coronation night sa Mutya Hong Butuan 2018.
Kini ang giklaro ni Paolo Gogo – information officer sa Butuan City government human nga nag-trending sa social media ang farewell speech ni Arbis kansa nagbulgar sa kwestyunableng pagpadagan sa organizer sa maong pageant.
Mahinumdumang ning mi-aging gabii, na-shock na lang ang mga spectators tungod kay inay mga pagpasalamat og pagdayeg ang madunggan unta sa katawhan apil na ang tips nga ihatag sa musunod sa iyang korona, gibulgar na hinuon niini ang dugay na niyang gihambin nga mga pangutana nga maoy rason nga daw nabati niyang tinuod ang panultihong ang pagka-mutya, pagwapa lang.
Apil sa wala niya ma-angayi nga maoy hinungdan nga iyang nabati nga daw wala’y pulos ang iyang pagkupot sa maong korona sulod sa usa ka tuig, ang wala paghatag sa organizer sa maong pageant sa insaktong premyong ila untang madawat base sa gipirmahan nilang memorandum of agreement, anaa pa ang wala pagpapirma kanila og kontrata alang sa ilang sundon nga regulasyon, og paghatag og bisan usa man lang ka proyekto.
Samtang sa panig sa city government, gibutyag ni Gogo nga ila kining susihon nga alegasyon aron mapapanubag ang angayang manubag sa maong isyu.
Misaad usab kini nga sugod karon, dili na masinatian sa mamahimong beauty title holders ning siyudad ang susamang kasinatian. (Beth Ruiz)
