BUTUAN CITY – Malaumon ang Department of Justice nga mabalik na sa Pilipinas si kanhing Negros Oriental 3rd District Rep. Arnolfo Teves Jr. gikan sa Timor Leste.
Sigon ni DOJ spokesperson Mico Clavano, himoon kini arun atubangon sa kanhing mambabalaod ang patong-patong nga kaso nga gipasaka kontra kaniya kansa may kalambigitan sa pagpatay kang kanhi Negros Oriental Governor Roel Degamo.
Sigon sa opisyal nga gipasaka na sulod sa 40 kaadlaw nga deadline ang mga requirements para ma secure ang victory sa extradition case kontra kang Teves.
Sumala usab sa kampo ni Teves nga 30 days lamang matud pa ang deadline para mapasaka ang Motion for Reconsideration sa Extradition Request kontra sa kanhing mambabalaod.
Si Teves ang gitudlong utok sa pagpatay kang Degamo ug sa laing siyam pa ka mga indibidwal niadtung Marso sa nakalabayng tuig.
Alayon niini, gipaniguro sa Department of Justice (DOJ) nga dili makapekto sa extradition case niini ang political asylum request ni Teves sa Timor Leste.
