BUTUAN CITY – Gawasnon na si kanhi Negros Oriental Rep. Arnie Teves gikan sa house arrest sa Timor Leste, kini sumala na sa kompirmasyon sa iyang abogado nga si Atty. Ferdinand Topacio.
Sigon sa abogado nga gikan matud pa sa reports sa media sa Timor Leste ang maong balita, diin gimando sa tribunal nga naghimo sa extradition proceedings ni Teves ang pagpalingkawas niini gikan sa house arrest.
Apan duna matud pay pipila ka mga kondisyon ang gipahamtang sa pagpalingkawas kang Teves, kansa gilangkuban sa regular reporting sa court officer ug commitment niini nga dili mohawas sa East Timor samtang anaa pa kini sa extradition case.
Subay niini, balik na sa kanhing gawasnon nga kinabuhi si Teves sigon sa korte sa Timor Leste nga nagtanggal sa bisa sa preventing detention order niini tungod sa mga nakitang depekto sa hangyo sa gobyerno sa Pilipinas para sa extradition niini.
Kadumdumang nagsugod ang hearing sa Court of Appelas sa Timor Leste sa extradition case ni Teves human ninghangyo ang gobyerno sa Pilipinas nga i-extradite si Teves pabalik sa nasod, asa gikaatubang niini ang mga kaso nga maykalambigitan sa pagpatay kang Negros Oriental Gov. Roel Degamo ug uban pang mga sibilyan sa Pamplona niadtung Marso 4, 2023.
