BUTUAN CITY – Blangko pa si Pinoy boxer Eumir Marcial kung asa siya magsugod human naparot kagahapon sa men’s 80 kgs. sa nagpadayong Paris Olympics.
Nakuha sa kaaway niininng si Turabek Khabibullaev gikan sa Uzbekistan ang unanimous decision victory.
Sa unang round pa lang, gigamit sa Uzbekistan boxer ang iyang kataas ug abot sa iyang kamot aron makuha ang paborableng score gikan sa lima ka mga judges.
Gipugos sa 28-anyos nga si Marcial nga maka-apas apan idlas ug paspas ang paglikay sa 20-anyos nga Uzbek boxer.
Human sa away, gipasalamatan sa Pinoy boxer ang mga misuporta kaniya ug nangayo og dispensa sa iyang kapakyas samtang naghilak nga migakos sa iyang asawang si Princess nga mi-comfort usab kaniya.
Emosyonal kini tungod kay iyang gisalindot una ang iyang professional boxing career aron lang tutukan ang away sa Olympics.
