BUTUAN CITY – Andam mutestigo si kanhi Ako Bicol representative Zaldy Co sa House Committee on Justice batok kang Pangulong Ferdinand Marcos Jr. kung ma-refer na ang impeachment complaint sa komite.
Sumala sa kanhi kongresista nga si Mike Defensor, naka-istorya siya kang Co bahin sa alegasyon nga nakadawat ang Pangulo og kickback gikan sa flood control projects ug budget insertions apan, wala gidawat sa Office of the Secretary General sa Kamara ang impeachment complaint nga gisubmite sa mga kritiko sa pangulo ug mga kaalyado sa mga Duterte ning mi-aging adlaw’ng Huwebes, Enero 22.
Lakip sa mga complainants niini sila kanhi Ilocos Sur governor Chavit Singson, kanhing kongresistang sila Jacinto Paras, retired general Hermogenes Esperon Jr., ug Atty. Ferdinand Topacio ug uban pa.
Ang grupo naghuna-huna usab sa pagpasaka og reklamong kriminal ug administratibo batok kang House Secretary General Cheloy Garafil tungod sa pagdumili sa pagdawat sa ilang reklamo sa iyang mga staff tungod sa iyang pag-absent.
