BUTUAN CITY – Wala’y nakitang foul play ang pamilya Sebuya sa kamatayon sa 27-anyos nga ulitawong magtutungha sa Caraga State University kon CSU kinsa napalgan na lang nga wala na’y kinabuhi sulod sa lawak sa iyang gi-abangang boarding house sa Purok-6, Barangay Ampayon ning siyudad sa Butuan ning mi-aging adlaw.
Sa report sa Butuan City Police Station kon BCPS-4, nagpatala na lang sa kapulisan si Jomari Sanchez, 24-anyos, ulitawo ug estudyante susamang tunghaan human nga mga alas-12:00 sa udto naplagan na lang niini ang iyang ka-boardmate nga si Jomel Enot Sebuya, ulitawo nga taga Purok-1, Barangay Charito, Bayugan City probinsiya sa Agusan Del Sur nga wala na’y kinabuhi.
Sa pagpanubay sa kapulisan, naasutang nakig-inom pa ang biktima kauban ang iyang mga barkada bandang alas 4:00 sa hapon tapad sa ilang boarding house og mipa-uli kini nga hubog na mga alas 8:00 sa gabii dayong tulog.
Apan dihang wala na kini mugawas sa kwarto pag-abot sa alas 11:00 sa buntag gisusi na nila kini ug didto na siya napalgan sa iyang mga higala nga wala na’y kinabuhi.
Girekomenda sa SOCO nga ipailalom sa otopsiya ang patay’ng lawas sa biktima apan nagdumili ang amahan niining si Joel Sebuya sa rasong kumbinsido kini nga ang gihambin niining balatian ang hinungdan sa iyang kamatayon.
