BUTUAN CITY – All set na ang House of Representatives alang sa umalabot nga State of the Nation Address kon SONA ni Presidente Ferdinand Bongbong Marcos Jr. karong umalabot nga Lunes, Hunyo 28, 2028.
Sa kasamtangan, 95% nang andam ang Kamara alang sa ika-upat nga SONA sa Presidente.
Sumala ni House spokesperson Atty. Princess Abante, duna na lamang matud pay mga minor adjustments nga kinahanglang lihukon alang sa nasangpit nga kalihukan.
Sumala sa tigpamaba nga duna na lamay himoong walkthrough sa House of Representatives ang mga delegado sa nasangpit nga SONA. Dugang niini, duna na usay contingency plan ang ubos balay-balaoranan ugaling mahitabo ang daot nga panahon sa mismong adlaw sa nasangpit nga SONA. Sumala ni Abante, wala matudpay undang ang HOR sa pagpangandam taliwala pa man sa nasinatiang mga pag-ulan ning nakalabayng adlaw hatud sa nakalabayng bagyong Crising.
Dugang sa opisyal nga gipinalisar na usab nila ang security measures alang sa maong kalihukan, diin kadaghanan niini ang sama lamang sa nakalabayng tuig nga SONA.
Subay niini, wala matud pay nadawat o nadungog ang mga otoridad nga bisan unsang hulga sa seguridad karon nga SONA. Kahinumdumang dunay gihimong security adjustments sa siguridad ang HOR s nakalabay nga SONA, human gi-isip sa mga opisyal nga hulga sa kinabuhi sa Presidente ang gikataho ni Vice President Sara Duterte nga dili matud pa siya moapil sa SONA tungod kay gidelegar niini ang iyahang kaugalingon isip designated survivor.
Designated Survivor ang tawag sa usa ka tawo nga maoy gitakdang mohulip sa Presidente ugaling mosuong ang pinakataas nga opisyal sa mga kalihukang dunay hulga sa iyahang kinabuhi.
Laumang mokabat matud pa sa 1,500 ang mo attend sa karon nga tuig nga SONA ni PBBM.
Subay usab ni Philippine National Police (PNP) chief Gen. Nicolas Torre III, anaa sa 12,000 ka mga police personnel ang e deploy alang sa SONA. Magdeploy matud pa ang ilahang buhatan og advance team karong umalabot nga Hulyo 26, samtang Hulyo 27 usab ngadto sa sayong bahin sa Hulyo 28 ang full deployment.
