BUTUAN CITY – Malampuson ang hiniusang puwersa sa kapulisan, lokal nga kagamhanan og militar sa Tandag City, Surigao Del Sur human napasurender ang 3 ka mga lider sa rebeldeng New People’s Army kon NPA kagahapon.
Ang nasangpit nga pagsurender ang gipaningkamotan sa Surigao del Sur Provincial Police Force, 36th Infantry Battalion, Philippine Army ug LGU Tandag sa pagpanguna ni City Mayor Hon. Alexander T. Pimentel.
Naila ang mga bulontaryong misurender nga sila Hermano Quezada alyas ‘Rado’, Company Leader sa SDG Platoon, Guerilla Front Committee 30, North Eastern Mindanao Regional Committee kon NEMRC; kauban sila Donita Martinez, mas nailang ‘Clara”, Medical Team Leader ug Romanito Molino, alyas ‘Tata’.
Gibiyaan sa mga niini ang kalihukan tungod sa kalisud nga nasinati, kawalay paglaum sa rebolusyon ug dili patas nga pagtratar sa mga kadagkoang kadre.
Misamot pa kini sa nagkagamay nga suporta sa masa human gideklara ni Pangulong Rodrigo Duterte nga terorista ang grupo og ang walay hunong nga kampanya sa kasundaluhan sa lugar.
Daghang mga kaubanan matud pa nila ang naghuna-huna na sa pagsurender og dayng angkon nga epektibo ang Martial Law.
