BUTUAN CITY – Padayon karun ang hotpursuit sa kasundaluhan batuk sa rebelding New People’s Army kon NPA human ang engkuwentrong natigayon kagahapon sa buntag sa bukirang parte sa Sitio Tigbao, Brgy Balite, San Francisco, Surigao del Norte.
Nahitabo ang sinukliay og ting-ga human makadawat og taho gikan sa mga sibilyan mahitungod sa presensya sa armadong grupo nga mihimo og pagpanghadlok og pagpangikil sa lugar.
Miresponde ang kasundaluhan gikan sa 30IB og samtang nagpahigayon og pagpatrolya sa komunidad aron kumpirmahon ang nasangpit nga sumbong, gi-arakan sila sa mga NPA nga gitoohang grupo sa Sandatahang Yunit Pampropaganda (SYP) 16B sa Guerilla ront (GF) 16 sa North Eastern Mindanao Regional Committee (NEMRC) nga gipanguluhan ni Pablo Logatiman o mas naila isip Alyas Lucas ug gelayong mibalos ang mga kasundaluhan nga nagresulta sa 30 minutos nga engkuwentro.
Gelayon usab nga misibat ang mga armadong NPA dala ang ilang samdan nga kaubanan ug nakumpiska ang usa ka M16 nga armas, duha ka ilegal nga pampabusikad, 195 ka nagkadaiyang klase sa bala, mga personal nga kagamitan, mga subersibong dokumento, duha ka poncho tent, tulo ka backpacks, mga gamit pangtambal, tungag sako sa bugas, siyam ka baterya, usa ka electrical tester, ug duha ka rolyo sa electric wire.
Samtang nagpadala gelayon ang Philippine Airforce og duha kag 520MG/Attack Helicopters aron motabang sa tropa sa kagamhanan. Walay nasamdan sa mga kasundaluhan sa nahitabong engkwentro.
