BUTUAN CITY – Gikatakdang desisyunan sa Court of Appeal kung ikonsidera ba niini nga usa ka porma sa pagpang-bully ang pagpangutot human nga usa ka engineer ang mipasaka og kaso batuk sa iyang kanhi employer tungod sa pagtugot matud pa sa ilang supervisor nga harason siya sa managlahing paagi og apil na niini ang pagpangutot diha mismo sa iyang tungod.
Sigon sa 56-anyos nga si David Hingst, ang pagpangutot matud pa diha sa iyang presensya, usa ka parte sa panagkunsabo aron lang mupahawa na siya sa iyang trabaho.
Nangayo og 1.8-million Australian dollars nga damyos si Hingst ngadto sa iyang kanhi employer nga Construction Engineering.
Atol sa pagtaral kondiin mas gipili ni Hingst ang pagrepresenta sa iyang kaugalingon, iyang gibutyag nga ang iya matud pang kanhi ka-ubanan sa trabaho nga si Greg Short, usa ka serial farter og kanunay nga nang-bully kaniya pinaagi sa pagpangutot.
Iyang gibutyag sa atubangan ni Justice Rita Zammit nga musulod lang og kalit si Short sa iyang gamay og wala’y bintana nga buhatan sulod sa daghang higayon kada-adlaw aron lang mangutot rason nga naghatag kini kaniya og seryusong psychological stress.
Human gipaminaw ang mga testimoniya sa duha ka panig, nagdesisyon ang judge nga dili bullying ang pagpangutot kondili usa matud pa ka klase sa pagbugal-bugal rason nga mi-apela si Hingst.
Iyang gibutyag nga pinaka-ubos ka-unom ka higayong mangutot sa iyang buhatan si Short kada-adlaw nga tungod sa kabaho sa otot niini, gitawag na siya sa ilang buhatan nga “Mr. Stinky”.
Gawas niini, kanunay pang manawag kaniya ang iyang kanhi supervisor aron didto mang-bully kondiin tawgon pa siyang hungog rason sa grabe niyang ka-stress nga miresulta sa iyang pagbiya na sa iyang trabaho.
