BUTUAN CITY – Usa ka kusog nga bomba ang gibuhian ni Engr. Brice Ericson Hernandez, kanhi assistant district engineer sa Department of Public Works and Highways kon DPWH- Bulacan, atol sa pagdungog sa House Infrastructure Committee ning adlawa.
Sa iyang handwritten affidavit, gidamay niya sila Senador Jinggoy Estrada ug Senador Joel Villanueva sa gina-ingong anomaliya sa mga flood control projects sa Bulacan.
Sa iya matud pang kasinatian, iyang masulti nga tinuod ang expose ni Senador Ping Lacson nga nahimo nang legman kon bagman silang mga engineers sa DPWH ngadto sa mga magbabalaud.
Dugang ni Hernandez, si Senador Jinggoy Estrada, naggahin og ₱355 milyon alang sa mga proyekto sa Bulacan karong tuiga kondiin duna kini kickback nga 30% nga iya matud pang bahin samtang si Senador Joel Villanueva, gilambigit sa ₱600 milyon nga flood control funds niadtong 2023, nga duna’y susamang 30% cut.
Dugang ni Hernandez, ang mga driver sa DPWH Bulacan ang nag-deliver sa mga kinahon-kahong kwarta sa mga opisina, base sa mando sa iyang kanhi boss nga si Engr. Henry Alcantara. Ang maong akusasyon hugot nga gipanghimakak ni Senador Jinggoy dayong hagit kang Hernandez na mag-lie detector test sa publiko: Tungod sa kabug-at sa mga pasangil, mihangyo si Engr Hernandez og proteksyon gikan sa House panel ug mihangyo nga dili na siya ibalik sa Senado alang sa iyang kaluwasan.
