BUTUAN CITY – Padayon nga mihimo og hot pursuit operation ang kapulisan aron mailhan og madakpan ang duha ka suspetsado nga mipusil-patay sa usa ka empleyado sa lokal nga kagamhanan sa miaging adlawa alas 4:20 sa hapon sa may Sian Bridge, Barangay Maharlika, Bislig City, Surigao del Sur.
Sa impormasyon gikan sa kapulisan sa Bislig City Police Station, naila ang biktima nga si Melecio Cagas Edulan, 55 anyos, menyu og residente sa Purok 12, Airport, Mancarogo, Poblacion, Bislig City.
Nagsumikad matud pa ang biktima sa City Organic Agri-Fisheries Tourism Center sa Sta. Cruz, Bislig City, sakay sa iyang single motor nga walay plaka numero.Pag-abot sa dapit nga nahitaboan, kalit siyang gipusil sa duha ka mga suspetsado nga nagpaabot sa daplin sa kalsada.
Bisan pa sa mga samad, nakapadagan pa siya og mga 100 metros una natumba ang iyang motorsiklo.
Nakaangkon siya og daghang samad pinusilan sa lawas nga miresulta sa iyang kamatayon.
Narekober sa kapulisan ang upat ka basiyo sa bala sa kalibre .45 nga armas sa crime scene.
Ang mga suspetsado misibat padulong sa direksyon sa Hinatuan, Surigao del Sur, sakay sa duha ka motorsiklo nga walay plaka numero.
Gawas sa hot pursuit operation, nakig-koordinar usab ang Bislig City Police Station sa ubang estasyon sa kapulisan aron magmuntar og mga checkpoint ug madakpan ang mga suspetsado.
