BUTUAN CITY – Nagpadala na ang Embahada sa Pilipinas sa Myanmar og team arun mutabang pagpangita sa upat ka mga Pilipino nga lakip sa gipangita sa syudad sa Mandalay, human ang 7.7 magnitude nga linog. Sumala ni Angelito Nayan, ang charge de affairs sa Embahada sa Pilipinas sa Myanmar, gilangkuban ang grupo sa lima ka mga miyembro lakip na ang vice consul ug ang defence attache.
Nasayrang lima ka oras ang byahe sa maong grupo gikan embahada ngadto sa nahisgutang dakbayan diin nawala ang mga Pilipino. Lakip sa gidala sa maong grupo ang mga supply nga ihatag niini sa mga apektadong Pilipino sa nasangpit nga lugar. Una nang gihatagan og importansya sa embahada ang ground assessment ug ang pagsusi sa kahimtang sa mga Filipino Community nga gi-igo sa linog.
Sigon ni Nayan, aduna’y kapin sa 170 ka mga Pilipininong magtutudlo sa Mandalay, kondiin ang uban kanila, mao pay pag-uli dihang ning-igo ang linog. Dugang sa opisyal, nasayod na lamang sila nga dunay upat ka mga Pilipinong nawala tungod sa taho sa mga Pinoy usab nga mga magtutudlo kansa nahimong ground coordinators sa Mandalay, apan dili una nila ipagawas ang identity sa nasangpit nga mga indibidwal.
Sumala niini, dili pa matawag nga missing o casualty ang maong mga indibidwal tungod kay wala pa man usab silay nadawat nga impormasyon mahitungod niini gikan sa mga opisyal sa nasangpit nga nasod. Kaganinang alas-kwatro sa kaadlawon, gihimo na sa Philippine Air Force (PAF) ang send-off ceremony alang sa Philippine Contingent for Humanitarian Assistance and Disaster Response Mission nga gipadala sa maong nasod.
