BUTUAN CITY – Miresulta sa dakong kadaot sa panginabuhian sa mga negosyante ug residente sa Barangay Masao ning syudad sa Butuan human nataho ang taas nga fecal coliform bacteria sa ilang kadagatan, base na sa migawas nga resulta sa water sampling nga gikuha sa mga sakop sa Environmental Management Bureau EMB sa Department of Environment and Natural Resources kon DENR, kansa lapas na sa standard nga presensya sa fecal coliform level, diin ming abot kini sa sa 900, subra’g triple kung itandi sa normal nga coliform content nga anaa lang sa 100.
Usa sa nakita nga hinungdan niini mao ang mga septic tank sa kabalayan nga anaa duol sa lugar nga wala matarong pagplastar hinungdan nga midagday kini sa kadagatan.
Sumala ni Marigold Aguaviva, negosyante ug residente sa maong barangay, sa wala pa miulbo ang isyu kabahin sa fecal coliform bacteria sa ilang dapit, mukita sila og 20-mil pisos matag_Sabado ug Dominggo, apan karon, lisod na silang mokita ug 5-mil pisos sa iyang mga itindang isda.
Panawagan nila nga unta mabalik na sa normal ang tanan, aron makabawi sila sa mga nalugi nilang negosyo.
Sumala usab sa usa ka caretaker ug residente sa maong lugar nga si Inday, sa pagkakaron mingaw ang sektor sa ilang turismo sukwahi kaniadto nga ubay-ubay nga mga tawo ang manuroy maatag-weekend.
