BUTUAN CITY – Gikumpirma sa France nga ilang na-intercept ang usa ka oil tanker sa Mediterranean Sea nga gituohang kabahin sa “shadow fleet” sa Russia nga gigamit sa paglikay sa mga sanctions.
Sigon ni French President Emmanuel Macron, ang tanker nga ginganlan og Grinch, cover sa international sanction ug gituohang naggamit og peke nga bandila.
Ang mga sakop sa French navy, uban ang tabang sa mga ka-alyadong nasud sama sa United Kingdom, misakay sa barko pila ka oras lang ang nakalabay, tali sa Spain ug Morocco.
Sigon sa mga otoridad sa kadagatan sa France, napamatud-an sa pagsusi sa barko, ang kadudahang parte sa pagkalehitimo sa bandila samtang gipadayag sa embahada sa Russia sa Paris nga wala sila masayod kalabot sa pag-intercept sa maong barko.
Ang gitawag nga shadow fleet sa Moscow mao ang usa ka tago nga network sa mga tankers nga gigamit aron malikayan ang mga sanksyon sa Kasadpan batok sa pag-eksport sa lana sa Russia, pinaagi sa pagpadala niini gamit ang mga karaang tankers nga adunay dili klaro nga tag-iya o insurance.
