BUTUAN CITY – Ipahigayon sa mga Muslim sa Pilipinas ang Eid’l Fitr sa Sabado, Marso 21, 2026, human ideklara sa Bangsamoro Grand Mufti nga wala nakita ang buwan sa gihimong moon sighting sa nagkadaiyang lugar sa nasud.
Gipahayag ni Sabuddin Abdurahim, Secretary sa National Commission on Muslim Filipinos ang disesyon kagahapong adlawa human sa obserbasyon sa crescent moon.
Magpabiling regular holiday karung adlawa, Marso 20, 2026, human sa unang deklarasyon sa Malacañang.
Ang Eid’l Fitr ang unang adlaw sa Shawwal, ang ika-10 ka buwan sa Islamic calendar o Hijri, ug senyales sa pagtapos sa balaang buwan sa Ramadan.
Mahinungdanon ang moon sighting sa pagtumbok sa pagsugod sa bag-ong buwan rasong nagkalain-lain ang petsa sa Ramadan ug Eid’l Fitr sa nagkadaiyang nasud sa depende sa lokal nga obserbasyon.
Kasagarang isaulog ang Eid’l Fitr sulod sa tulo ka adlaw nga sugdan sa pag-ampo sa mosque sa buntag nga sundan sa panagtapok sa pamilya ug pagpa-ambit sa pagkaon ug regalo.
Samtang mas sayung saulogon ang Eid’l Fitr sa pipila ka nasud sa Middle East sama sa Saudi Arabia, United Arab Emirates, Kuwait, Qatar, ug Bahrain sa Biyernes, samtang dungan sa Pilipinas ang Malaysia ug Brunei sa pagsaulog sa Sabado.
