BUTUAN CITY – Gikatakdang mobiyahe paingon sa Estados Unidos sunod semana ang economic team ni Pangulong Ferdinand Marcos Jr alang sa round-table negotiation uban kang US President Donald Trump human ang pagpadala ni Trump og sulat nga nagpahibalong magpatuman siya og 20 porsyentong taripa sa mga produktong gikan sa Pilipinas sugod karong Agusto 1.
Sigon ni Presidential Assistant on Investment and Economic Affairs Secretary Frederick Go, siya ang mangulo sa delegasyon kauban sila Trade Secretary Chris Roque, Secretary Perry Rodolfo, ug Undersecretary Allan Gepty.
Gibutyag niining mas epektibo ang personal o face-to-face nga panag-istorya dungan sa pagbutyag nga buhaton nila ang tanan nilang makaya aron mapakunhod ang ipatong nga taripa.
Una nang nagbahad si Trump sa ubang mga nasud nga iyang pahamtangan og dako nga taripa kung dili sila makigpulong og personal kaniya.
