Naunlod ang liberian-flagged cargo ship kansa dunay kargang mga delikadong kemikal sa may kadagatan sa Kerala, India, kini sumala na sa Indian Navy ning adlawa, Mayo 25.
Sakay usab sa maong barko ang 24 ka mga tripulante gikan sa mga nakadaiyang nasod sama sa Georgia, Russia, Ukraine, ingon man Pilipinas kansa luwas ra usab nga nasagos sa mga awtoridad.
Naila ang maong cargo ship nga MSC ELSA 3 kansa dunay 184 metro nga gitas-on, nag-lawig kini gikan sa Vizhinjam padulong sa Kochi sa maong nasod. Nagpadala matud pa kini og distress signal niadtung Sabado pa lamang.
Nakit-an ra ang maong barko gamit ang mga eroplano sa Indian Navy sa 38 nautical miles southwest sa Kochi nga naglutaw na sa delikadong posisyon.
Sumala sa pamahayag sa Indian Ministry of defense, anaa matud pa sa 640 containers ang sakay sa barko, lakip na ang 13 ka mga hazardous containers ug uban pang 12 nga dunay sulod nga calcium carbide —kemikal nga ginagamit sa paghimo og abono ug puthaw.
Karga usab sa maong barko ang anaa sa 370 ka toneladang lana ug gas, apan sigon sa coast guard, wala pay natalang oil spill sa maong lugar.
Andam matud pa ang Indian Coast Guard para sa posibleng pollution response batok sa oil spill sa kadagatan sa Kerala.
