BUTUAN CITY – Dunay mga persons of interest na ang kapulisan sa nahitabong paglung-go sa ulo sa usa ka Security Guard nga nakaduty sa usa ka dialysis center sa may Intino Building Pareja Street Barangay Bayanihan Butuan City.
Sigon ni PO2 Bernard Amora, sa Butuan City police station-3, dili pa nila panganlan ang ilang gipanubayang indibidwal nga gidudahang responsable sa mangil-ngig nga kamatayon sa security guard nga si Junipher Bustillo nga residente lang sa maong subdivision.
Gipahayag ni PO2 Amora nga nakaplagan nalang kaganinang ala1:30 sa kaadlawon ang patay’ng lawas sa biktima diin nabulag ang ulo niini, mga 10 metros gikan sa lawas.
Gawas pa kini sa linubaan diha sa tiyan nga maoy hinungdan matud pa nga migawas na ang tinae sa biktima ug mga samad pa sa nawong niini.
Base matud pa sa otopsiya sa patay’ng lawas, wala na kasukol pa ang biktima.
Nanghinaot nalang ang kapulisan nga nakuha sa CCTV Camera ang mga tawong misulod sa maong dakbalay.
Nakig-koordina na usab ang kapulisan sa security agency sa biktima kung duna ba kini isyu nga armas.
Hilabihan nalang ang kakurat matud pa sa iyang kaubanang guwardiya sa dihang sa pagpasiga sa suga nakita ang lawas sa biktima nga wala nay ulo diha sa ubos sa iyang gihigdaan.
Sa karun, padayon pa ang lawom nga imbestigasyon sa maong panghitabo samtang gipahiluna ang patay’ng lawas sa biktima sa usa ka punerarya sa may JC Aquino, ning siyudad sa Butuan.
