BUTUAN CITY – Subling gipamugos ni kanhi Pangulong Rodrigo Duterte nga ang iyang war on drugs alang sa kaayuhan sa katawhang Filipino ug sa tibuok nasud.
Kini matud pa ang mensaheng gipa-abot sa kanhi pangulo ngadto sa iyang anak nga si Vice President Sara Duterte dihang katapusan iya kining nakahinabi sulod sa detention center sa International Criminal Court kon ICC.
Sa pagkakaron, bugtong hangyo sa kanhi pangulo nga paspasan ang proseso sa iyang kaso tungod kay posible matud pang ma-abtan siya og kamatayon sa kostudiya sa ICC.
Gikumpirma usab sa besi-presidente ngadto sa iyang amahan nga kompleto na ang legal team sa iyang amahan ug naka-istorya na usab niini ang bag-ong abogado sa ilang grupo.
Samtang gipadayag pa ni VP Sara nga sa iyang pagpa-uli sa Pilipinas, puli-puli silang managsoon aron mubantay ug maka-istorya sa ilang amahan sa ingon ma-update kini sa mga nagapanghitabo sa nasud ug masayran usab sa tanang Pilipino sa tibuok kalibutan ang update sa kaso sa kanhi pangulo.
