BUTUAN CITY – Malampuson ang usa ka semanang pagsa-ulog sa katawhan sa Nasipit, Agusan del Norte sa ilang Dunggo Festival kagahapon subay na usab sa kapistahan sa patron sa maong lungsod nga si Sr. San Miguel.
Gibutyag ni Mayor Enrico Corvera nga mismong ang Municipal Tourism Council ang mipili sa pangalan sa maong festival kansa gikuha gikan sa pantalan nga usa mga landmarks og maoy gateway sa mga tawong musulod-gawas sa lalawigan og bisan sa Caraga Region.
Gidugang sa mayor nga ubay-ubay nga mga kalihukan ang gihimo isip opening salvo sa maong festival. Apil niini ang pagpahigayon og logo contest aron makapili og logo nga gamiton sa Dunggo Festival.
Gikalipay sa mayor nga taliwa nga gi-ulan ang ilang mga kalihukan sulod sa usa ka semana, daghan pa gihapong katawhan ang miduyog sa maong kasa-ulugan.
Gipadayag niining kada-tuig na nilang sa-ulugon ang maong festival pinaagi sa mga street dancing contest nga salmutan sa i-cluster nga mga barangays.
Kabahin usab sa nakahan-ay nga mga kalihukan sa maong festival ang dinner for a cause nga himuon ugmang adlawa kansa salmutan sa mga nagtrabaho sa abroad nga mga Nasipitnon.
Tumong niini nga ang matigom nga kwarta, magamit nga panggasto sa mga kabus nga kabataan sa ilang lungsod nga gustong makatapos sa pagtungha apan wala’y panggasto ang ilang ginikanan. (Beth Ruiz)
