BUTUAN CITY – Gi-atangan na sa daghang mga Pilipino ang pagdula karung adlawa sa pipila ka mga atletang pinoy human ang opening ceremony kagabii sa 2020 Tokyo Olympics sa Japan.
Sa eksklusibong pakighinabi sa Bombo Radyo Butuan kang Bombo Samurai International Correspondent Marco Brazil, gibutyag niini nga kagahapon pa lang sa buntag adesir nagsugod ang seremonya, duna nay tulo ka mga turistang Pinoy ang gipapa-uli balik sa nasud tungod kay nagpositibo sila sa COVID-19.
Nasayrang kagahapon pa lang sa buntag, unang Pinoy ang mi-advance na sa quarter final nga mao si Chris Nievarez sa rowing kansa nag-qualify na sa quarterfinals.
Samtang unyang alas 10 sa buntag sugdan ang dula sa boxing ni Nestie Peticio alang sa welterweight round 32 kansa maoy gilauman nga makakuha og medalya samtang pagka-alas 11, ang representante na usab sa taekwondo nga si Kurt Bryan Borbosa ang musalmot.
Unyang alas 6:30 sa gabii, sugdan na usab ang swimming women’s butterfly nga representahan ni Remedy Alexis Raul ug sa qualification round ang musalmot niini mao ang representante sa Gymnastics nga si Carlos Yulo kansa usa sa mga gi-atangan.
Sumala pa ni Brazil, dili tanang atleta ang miparada tungod sa COVID-19 ug kampante siya nga makakuha og 5 ka medalya ang Pilipinas bisan og 19 lamang ang mga atleta nga misalmot alang sa nasangpit nga Olympic.
Gidugang pa niini nga simple lang ang gipahigayong opening ceremony kagabii sukwahi niadtong miaging mga Olympics nga bongga apan tungod sa pandemya, giminusan ang mga mitambong.
Gibutyag pa ni Brazil nga wala malugi ang Japan sa pagpahigayon sa maong sporting event taliwala sa pandemya o krisis sa kalibutan tungod kay nadayun gihapon ang maong aktibidad.
Gani lakip sa gipangandaman sa Japan, ang paghatag og pahalipay sa mga makakuha og bulawanong medalya ilabina nga dili maulahi ang maong nasud sa kompetisyon tungod kay kaniadto pa lang, gi-promote na sa maong nasud ngadto sa kabataan ang sports dungan sa pagdasig sa nga kung dunay mga dagkong aktibidad susama sa Olympic kinahanglan nga salmotan kini.
Sukwahi matud pa kini sa pamaagi sa Pilipinas tungod kay focus sa atong nasud mao ang pageantry industry gawas lamang sa sports nga Basketball hinungdan nga gikan sa Japan ang naghatag og kahayag sa Olympic pinaagi ni Naomi Osaka.
