BUTUAN CITY – Napatay ang duha ka turistang Russian national samtang nagpahigayon og scuba diving sa katubigan dool sa Verde Island, Batangas City sa nakalabay nga adlaw. Nahitabo ang insidente bandang ala-1 sa hapon samtang nag-scuba diving ang upat ka Russian national dool sa Pulong Bato, Verde Island.
Nadala pa sa St. Patrick Hospital sa nasangpit nga siyudad ang unang nakitang Russian national apan gideklarang dead on arrival kini.
Paglabay sa 4 ka oras, nakaplagan na usab ang naglutaw-lutaw nga patay’ng lawas sa ikaduhang Russian national nga putol na ang tuong kamot.
Sumala sa inisyal nga imbestigasyon sa mga otoridad, kalit lang matud pa nga na-usab ang sulog sa tubig sa dagat samtang misalom ang mga turista.
Nakahaw-as pa ang duha ka Russian divers ug master divers samtang nabulag sa grupo ang mga namatay.
Naglisud ang PCG sa pagrekober sa lawas sa biktima tungod sa mga shark o iho nga nagpalibot sa katubigan.
