BUTUAN CITY – Disyamado ang mga party-lists nga Duterte Youth ug Bagong Henerasyon human nga wala sila tuguti sa Commission on Elections kon COMELEC nga maproklama karong hapuna ka-uban unta ang 52 ka lain pang mga winning party-lists human ang May 12 national and local elections.
Sigon sa COMELEC, ang mi-abot kanilang resolusyon sa National Board of Canvassers, naglatid sa seryoso matud pang alegasyon sa paglapas sa election laws.
Nasayrang ang petisyon batuk sa Duterte Youth giduso nila Reeva Magtalas ug uban pa niadtong Mayo 15, ug sa Youth Advocates for Climate Action Philippines ka-uban ang student regents sa PUP ug sa UP niadtong Mayo 8 samtang usa ka abogado nga si Russel Stanley Geronimo usab ang nagduso og kaso batuk sa Bagong Henerasyon.
Hugot nga gikondena sa Duterte Youth ang suspensyon dayong tawag niining grave abuse of discretion samtang nagbahad usab ang chairman nilang si Ronald Cardema nga ibulgar ang kahiwian sa COMELEC ug sa Kongreso kung dili sila palingkuron.
Samtang gibutyag usab sa Bagong Henerasyon nga wala sila’y nadawat nga abiso kalabot sa kaso dayong panawagan sa COMELEC nga ipadayon ang ilang proklamasyon isip representante sa kapin 319,000 ka mga botante.
Sa kasamtangan, duna;y nakuhang 5.6% nga boto ang Duterte Youth kansa bugti sa tulo ka puwesto sa Kongreso, samtang usa ka pwesto usab sa Bagong Henerasyon tungod sa ilang nakuhang 0.8% nga boto.
