BUTUAN CITY – Nadugangan pa og laing mga kaso ang gipasaka sa kapulisan sa Surigao City batuk sa nangulo sa nagpa-ilang Federal Tribal Government of the Philippines nga sila Jorgeto Corpuz Santisas alyas Datu Adlaw ug Bae Lourdes Latraca Infante.
Sigon ni Police Lt. Col. Mariano Lukban, hepe sa Surigao City Police Station, gidugang nila sa pagsang-at ang kasong qualified trafficking in person human nasuta nga duna’y mga minor-de-edad sa ilang grupo ingon man ang duha ka ihap sa large scale illegal recruitment, base usab sa mga nagsurender nga mga miyembro niini nga gikan pa sa Monkayo, Davao De oro og na-recruit pinaagi sa pasalig nga dunay job hiring sa Surigao City diin 18-mil pisos ang sweldo matag-bulan.
Gani, 10 ka indibidwal ang mibiya sa ilang trabaho isip mga furniture-makers apan pag-abot sa Surigao, gi-isyuhan naman sila og tribal sword og gihimong guwardiya sa compound sa maong grupo.
Sumala ni Atty. Lukban, pulos bug-at ang maong mga kaso nga walay gitakdang piyansa.
Nasayran nga mihatag usab og pinansiyal nga tabang ang lokal nga kagamhanan sa Surigao City ngadto sa mga miyembro nga gusto nang mupa-uli sa ilang tagsa-tagsa ka mga lugar human na-ilad sa peke nga tribu.
