BUTUAN CITY – Duha ka mga Overseas Filipino Workers sa Iran gikan sa Central Visayas ang nangayo og tabang sa Overseas Workers Welfare Administration kon OWWA aron maka-uli na sa nasod tungod sa epekto sa panagbangi sa Israel ug Iran.
Ang maong mga OFWs gikan sa Cebu ug sa Siquijor nga parehong ubos sa hurisdiksyon sa OWWA-7 tungod kay wala man kini regional office sa Negros Island Region.
Sumala ni Christina Marie Vistal, opisyal sa OWWA, mismong ang pamilya sa duha ka mga OFWs ang niduso og repatriation request taliwala sa nagtunhay nga ceasefire sa duha ka mga nasod.
Nasayrang wala pa gihapon gilibkas sa ahensya sa Pilipinas ang Alert Level 3 nga nagpasabot nga walay OFWs nga gitugotan nga makagawas sa Pilipinas aron manarbaho tungod sa kagubot.
Samtang ang mga Filipino workers nga atua sa Nevo Hotel sa Dead Sea, nadayong nakadawat og hinabang gikan sa kagamhanan sa Pilipinas pinaagi sa Philippine Embassy ug sa Department of Migrant Workers kon DMW.
Gipahimangnuan usab ang mga OFWs nga magpabiling alerto ug konektado sa Philippine Embassy sa Tel-Aviv alang sa dinaliang assistance panahon sa emerhensiya.
