BUTUAN CITY – Kulang kaayo ang supply sa dugo dinhi sa Agusan del Norte karong panahon sa COVID-19.
Kini ang gikumpirma ni Philippine Red Cross kon PRC-Agusan del Norte chapter administrator Alger Boter dungan sa pagpasalamat sa Bombo Radyo Butuan nga may kanunay nilang media partner alang sa pagpangolekta og dugo pinaagi sa Dugong Bombo projects.
Sigon ni Boter, tungod sa delikadong dala sa coronavirus, daghang mga blood-letting activities ang gipangkansela ug daghan na usab ang wala na mag-organisa niini tungod sa kabalakang mataptan unya og COVID-19 ang mga tawo.
Samtang aminado ang PRC-Agusan del Norte chapter nga wala pa sila’y convalescent plasma procedure tungod kay ang ila pang sentrong buhatan kon National Blood Center sa Mandaluyong City ang duna niini.
Gipadayag ni PRC-Agusan del Norte chapter administrator Alger Boter nga wala pa sila’y makina aron maoy mukuha sa convalescent plasma diha sa dugo gikan sa mga donors nga mao kadtong na-igo na sa COVID-19 apan nakarekober na.
Gipasabot pa ni Boter nga ang pagkuha og plasma susama ra gihapon niadtong magdonar og dugo kondiin diha gihapon magtupok gihapon sa bukton apan tapad niini ang makinang maoy mukuha sa plasma lang gikan sa dugo.
