BUTUAN CITY- Nangita pa ang International Criminal Court kon ICC og dugang nga mga saksi kalabot sa reklamo batok kang kanhi Presidente Rodrigo Roa Duterte.
Sumala sa legal expert nga si Atty. Vince Orly Montalban, nga medyo maka-alarma ang maong kalihukan bisan pa nga dili kini direktang paglapas sa mga lagda ug proseso sa ICC tungod kay anaa pa kini sa pre-trial chamber. Sa kasamtangan, nagpadayon pa ang pagtigom sa impormasyon ug ebidensya alang sa kaso.
Gani gikwestyon usab ni Montalban ang kalig-on sa kaso batok sa kanhi presidente, diin kung lig-on matud pa ang ebidensya, dili na kinahanglanon ang pag-apelar ug pagpangita og dugang nga mga saksi.
Gipasi-ugda usab niini, nga sa Pilipinas ang kasagari nga naandan mao ang kinahanglang adunay prima facie case with reasonable certainty of conviction aron mapadayon ang kaso.
Sigon pa sa abogado, nga tungod niini klaro nga adunay kahuyang sa ebidensya kansa gisang-at sa ICC ug kini makahatag og pangutana sa kusog ug direksyon sa kaso batok kang Duterte
Dugang pa ni Atty. Vince Orly Montalban, nga mipakita lang nga dili lig-on ang kaso batok sa kanhi Presidente tungod kay hangtod karon nagpadayon pa ang pagpangita og mga witnesses ang ICC.
Matod pa niya, makita nga adunay impresyon nga mahuyang ang ebidensya sa prosecution, diin daw gihimo lang og basehan ang pipila ka mga pronouncement sa presidente kansa dili angay tagaan og bug-at nga bili tungod kay ang mga pulong, inay joke lamang.
Gitandi usab niini ang pamalakad sa Pilipinas ug sa International law, diin ang naandan dinhi sa nasud mao ang dili pa-angay ipasaka ang kaso hangtod nga mahimong klaro ug igo na ang ebidensya aron makahatod ngadto sa conviction, sama sa nahitabo sa kaso ni Atong Ang nga dugay na nga gitigum ang ebidensya sa prosecution hangtod nga nakahimo kini og lig-on nga basehan sa pagsang-at sa korte ug pag-isyu sa warrant of arrest.
Sa kaso usab ni Duterte, sigon ni Montalban nga lahi ang nahitabo diin wala pa matukod ang gikinahanglan nga ebidensya apan gidakop na kini, kansa nagpakita og kasuwhai sa proseso ug naghatag og pangutana sa kalig-on sa kaso nga gisang-at sa ICC.
