BUTUAN CITY – Target karon sa Department of Education nga makapasiga pa og 290 ka mga off-grid schools sa entiro nasud kon mga tunghaan nga grabe kalayo, isip benepisyaryo sa electrification program sa gobyerno nga nakatutok lang diha sa mga tunghaan sa hilit nga mga lugar.
Kini human ang pag-pilot launch kagahapon ni Education Secretary Sonny Angara ka-uban ang mga opisyal sa National Electrification Administration kon NEA sa last-mile school sa Datu Saldong Domino Elementary School didto sa Sitio Tagpange sa Barangay Simbalan, Buenavista, Agusan del Norte nga kabahin lang sa mga off-grid schools.
Highlight sa maong kalihukan ang epekto sa “digital bayanihan” tali sa mga ahensya sa gobyerno ug ubang mga stakeholders aron maka-abot ug madasig ang mga magtutungha sa mga hilit nga dapit sa nasud diha sa ilang pagtungha.
Sigon ni Secretary Angara, pinaagi sa digital bayanihan, ilang na-connect ang mga tunghaan ug mga estudyante alang sa mas maayo nilang kaugmaon.
Nasayrang duha ka suba ang gitabok ni Angara ug ubang mga opisyal aron lang maka-abot sa last-mile school ang maong proyekto nga poinaka-una sa Pilipinas kondiin nasaksihan ang paagi pag-energize niini gamit ang mga solar panels sa NEA.
Gitunol usab sa kalihom kagahapon ang mga connectivity tools, apil na ang mga Starlink units, mga tablets, smart TVs, electric fans, ug uban pang mga learning devices.
