BUTUAN CITY – Gideklarang persona non-grata sa Butuan City Council si Department of Trade and Industry kon DTI-Caraga Regional Director Brielgo Pagaran.
Gikumpirma kini ni Konsehal Cromwell Nortega sa ekskilusibong pakighinabi sa Bombo Radyo Butuan kondiin iyang gipadayag nga na-aprubahan kini atol sa special session sa Sangguniang Panglungsod kagahapong adlawa base sa resolusyong nagtumong sa maong lakang.
Pasabot pa ni Nortega, nasakitan ang konseho sa mga pamahayag ni Pagaran diha sa social media nga nag-atake kang Butuan City Mayor Ronnie Vicente Lagnada.
Sumala pa ni Nortega, daghang mga batikos na ang nadawat sa administrasyon apan karon lang sila nagduso sa maong resolusyon tungod kay below the belt na matud pa ang pag-atake ngadto sa taas nga opisyal sa kagamhanan.
Gidugang pa sa konsehal nga ipagawas pa ang kopya sa na-aprubahan nilang resolusyon.
