BUTUAN CITY – Gipadala na sa Department of Social Welfare and Development kon DSWD-Caraga ang ilang mobile command center didto sa Surigao City, lalawigan sa Surigao del Norte.
Sigon ni Eva Mytha Banzon, ang disaster response information officer sa maong buhatan, padayon ang ilang pagpang-apod apod sa naka-preposition na nilang mga family food packs alang sa mga internally displaced persons kon mga namakwit.
Kini wala pa’y labot sa ilang ipang-apod apod nga mga family food packs gikan sa ilang provincial warehouse sa lungsod sa San Jose sa Dinagat Islands province padulong na ngadto sa lungsod sa Tubajon.
Nasayrang mu-abot sa 17,377 ka mga family food packs ang gitagana sa Dinagat Islands province padulong ngadto sa mga apektadong lungsod; 16,655 sa Surigao del Norte; 6,353 sa Agusan del Norte; samtang 8,753 sa Agusan del Sur ug 23,045 sa Surigao del Sur.
Dugang sa opisyal, magpadayon ang ilang paghimo og mga lakang samtang anaa pa sa bisinidad ning rehiyon sa Caraga ang bagyong Tino.
