BUTUAN CITY – Sunod-sunod nga mga payouts ang gipangunahan ni Department of Social Welfare and Development kon DSWD Sec. Rex Gatchalian didto sa mga lungsod sa mga lungsod sa General Luna ug Dapa sa Siargao Islands, Surigao del Norte.
Sa eksklusibong pakighinabi sa Bombo Radyo, gipadayag ni DSWD-Caraga spokesperson Mark Davey Reyes nga didto sa General Luna, payout alang sa Energency Shelter Assistance kon ESA ang gihimo samtang sa social pension usab didto sa lungsod sa Dapa.
Human niini, nakigtagbo usab ang kalihim ngadto sa siyam ka mga mayor sa Siargao Islands kondiin ilang gihisgutan ang mga panginahanglanon sa matag-lungsod nga mahimong sudlan sa ilang ahensya.
Samtang gipasabot sa opisyal nga nag-agad lang sila sa listahan sa mga local government units sa gihatagan nila og emergency shelter assistance kon ESA.
Kini human mi-abot kanila ang reklamo sa kagamay lang matud pa sa mga nakadawat niini taliwa sa kadaghan sa mga nabiktima sa kalamidad nga angayang hatagan niini sama sa bagyong Odette, mga pagbaha nga hatud sa daut nga panahon niadtong buwan sa Enero ug sa uban pang kalamidad.
Giklaro pa niini nga tungod sa kakulang sa ilang pundo, ang ilang giprayuridad sa paghatag sa ESA mao kadtong nawad-an gayod sa ilang panimalay.
